ৱৰ্লড য়ুথ ফেষ্টিভেলত ভাৰতক প্ৰতিনিধিত্ব কৰিবলৈ নিৰ্বাচিত হৈছে শিলচৰৰ যুৱক নেহাল ভট্টাচাৰ্য
ৰাছিয়াত আৰম্ভ হৈছে ৱৰ্লড য়ুথ ফেষ্টিবেল। ৱৰ্লড য়ুথ ফেষ্টিভেলত ভাৰতক প্ৰতিনিধিত্ব কৰিবলৈ নিৰ্বাচিত হৈছে শিলচৰৰ যুৱক নেহাল ভট্টাচাৰ্য। ৰাছিয়াৰ ৰাষ্ট্ৰপতি ভ্লাদিমিৰ পুটিনৰ পৃষ্ঠপোষকতাত ৰাছিয়াৰ ছোচিৰ ছিৰিয়াছ ফেডাৰেল টেৰিটৰীত ৭ মাৰ্চলৈ এই উৎসৱ অনুষ্ঠিত হ’ব। পণ্ডিচেৰী বিশ্ববিদ্যালয়ৰ পৰা থিয়েটাৰ আৰ্টছত স্নাতকোত্তৰ ডিগ্ৰী লাভ কৰা নেহালে এই বিশ্বব্যাপী অনুষ্ঠানত প্ৰতিনিধি হিচাপে অংশগ্ৰহণ কৰাৰ সুযোগ পাই উৎফুল্লিত। সৰুৰে পৰা নাট্য কলাৰ সৈতে সক্ৰিয়ভাৱে জড়িত নেহালে এই সুযোগক ভাৰত আৰু ৰাছিয়াৰ মাজত সাংস্কৃতিক আদান-প্ৰদানৰ এক মঞ্চ হিচাপে লৈছে।
তেওঁ দুয়োখন দেশৰ সাংস্কৃতিক আৰু ঐতিহাসিক সম্পৰ্কৰ ওপৰত আলোকপাত কৰি ভাৰতীয় নাট্য কলাক আন্তঃৰাষ্ট্ৰীয় মঞ্চত প্ৰতিনিধিত্ব কৰাৰ ওপৰত গুৰুত্ব আৰোপ কৰিব নেহালে। বিশ্ব যুৱ মহোৎসৱত নেহালৰ একক অংশগ্ৰহণৰ লক্ষ্য হৈছে ভাৰত আৰু ৰাছিয়াৰ সাংস্কৃতিক ঐতিহ্য আৰু বন্ধুত্বক উদযাপন কৰা। জনা যায় যে প্ৰতি বছৰে ৰাছিয়াত অনুষ্ঠিত হোৱা বিশ্ব যুৱ মহোৎসৱত বিশ্বৰ বিভিন্ন প্ৰান্তৰ পৰা প্ৰায় ২০,০০০ যুৱকে অংশগ্ৰহণ কৰে। ইয়াৰ ভিতৰত ১৮ৰ পৰা ৩৫ বছৰ বয়সৰ যুৱনেতা, গৱেষক, খেলুৱৈ আৰু আমোলা আছে। এইবাৰ ৩৬০ গৰাকী গতিশীল ভাৰতীয় যুৱকৰ ভিতৰত নেহালকো এই উৎসৱত অংশগ্ৰহণৰ বাবে নিৰ্বাচিত কৰা হয়। বিভিন্ন ক্ষেত্ৰৰ প্ৰতিভাৱান ব্যক্তিৰে গঠিত ‘ভাৰত ৩৬০’ নামৰ দলটোৱে যুৱ মহোৎসৱত ৰাছিয়াত গৌৰৱেৰে ভাৰতৰ পতাকা উৰুৱাব। নেহালে এই অনুষ্ঠানত সম্পূৰ্ণ হৃদয়েৰে অৰিহণা যোগাবলৈ দলৰ প্ৰস্তুতিৰ ওপৰত আলোকপাত কৰে।ভাৰতীয় প্ৰতিনিধি দলটোৰ লক্ষ্য হৈছে বিশ্বজুৰি যুৱক-যুৱতীসকলৰ সৈতে সাংস্কৃতিক আদান-প্ৰদান আৰু সহযোগিতামূলক আলোচনাৰ জৰিয়তে ভাৰতৰ বৈচিত্ৰ্য, সৃষ্টিশীলতা আৰু সম্ভাৱনাক প্ৰদৰ্শন কৰা।